> बेरक्याला माहिती देण्यासाठी ई - मेल करा - berkya2011@gmail.com

शनिवार, २६ एप्रिल, २०१४

पत्रकारांनो, खबरदार! स्टिंग ऑपरेशन कराल तर तुरुंगात जाल! Inbox x


पत्रकारांनो तुम्ही जर स्टिंग ऑपरेशन करून एखादी सनसनाटी आणि एक्स्ल्युझिव्ह बातमी देण्याचा विचार करीत असाल तर यापुढे खबरदार! कारण हा रस्ता तुम्हाला तुरुंगात घेवून जावू शकतो. तेव्हा आजवर केली तेव्हढी स्टिंग ऑपरेशन पुरी! 
 
सुप्रीम कोर्टाने एका निर्णयात स्पष्ट केले आहे की, कोणत्याही व्यक्तीला एखाद्या अपराधात सापडावण्यासाठी किंवा रंगेहाथ पकडण्यासाठी, त्याचे बिंग फोडण्यासाठी अथवा त्याची कर्तव्यातील कुचराई पकडण्यासाठी गुप्त रितीने केले गेलेले स्टिंग ऑपरेशन हे पूर्णत: बेकायदेशीर आणि अनैतिक आहे. इतकेच नाही तर स्टिंग ऑपरेशन करणारयांविरुद्ध कायदेशीर कारवाई करावी आणि गुन्हे/खटले दाखल करावेत; असेही आदेश सुप्रीम कोर्टाने दिले आहेत. 
 
याचाच सरळ-सरळ अर्थ म्हणजे यापुढे लाचखोर सरकारी अधिकारी आणि नेते; खंडणीबहाद्दर; शोषणकर्ते यांना आता मोकळे रान मिळणार आहे व पत्रकार, सामाजिक कार्यकर्तेच गुन्हेगार ठरणार आहेत. 
 
आता या निर्णयाविरुद्ध एरव्ही उठसूठ निषेधाच्या घोषणा देणारया व पत्रकबाजी करणारया तसेच चांगल्या अशा सर्वच पत्रकार संस्थांनी एकत्र येवून पुनर्विचार याचिका दाखल करायला हवी. अन्यथा सुप्रीम कोर्टाचा हा निवाडा म्हणजे पत्रकारांची मुस्कटदाबी आणि लाचखोरांची मुजोरी वाढविणारा ठरेल. 'बेरक्या' सर्व पत्रकार आणि संघटनांना या निर्णयाविरोधात एकत्र येण्याचे आवाहन करीत आहे. भलेही कोर्टाचा अनादर होईल म्हणून कुणी शेपूट घालीत असेल तर अशा अनादराच्या धमक्यांना भीक न घालणारे झुंझार आणि लढावू बाण्याचे निखील वागले यांच्याकडे या लढ्याचे नेतृत्त्व सोपवा! महाराष्ट्रातील पहिला घोटाळा म्हणजेच धुळे जिल्हा परिषद अपहारकांड 25 वर्षांपूर्वी खणून काढणारे खानदेशातील ज्येष्ठ पत्रकार जगताराव सोनवणे हे अशा अनेक कोर्टांच्या अनादाराचे बारसे जेवलेले आहेत; त्यांची मदत घ्या!!
 
ही बातमी सविस्तर इथे वाचा
 

शुक्रवार, २५ एप्रिल, २०१४

पेड न्यूज : १४६ जणांना नोटीसा


प्रसिद्धी माध्यमांना पेड न्यूज देऊन स्वत:ची प्रसिद्धी करून घेतल्या प्रकरणी केंद्रीय मंत्री प्रफुल पटेल, नाना पाटोले, पुण्यातील काँग्रेस उमेदवार विश्वजीत कदम आदीसह १४६ जणांना निर्वाचन अधिकाऱ्यांनी नोटीसा बजावल्या आहेत.पेड न्यूज सारखे प्रकार रोखण्यासाठी निवडणूक आयोगाचे प्रयत्न असले तरी हा खर्च उमेदवाराच्या निवडणूक खर्चात टाकण्याशिवाय आयोगाला स्वत:हून कडक कारवाई करता येत नाही. मात्र याबाबत कोणाची तक्रार आल्यास उमेदवाराला अपात्रही ठरविले जाऊ शकते, असे कायदेतज्ज्ञ व आयोगातील वारीष्टांचे  मत आहे.प्रसिद्धीमाध्यमांमधील ’पेड न्यूज’ला प्रतिबंध घालण्यासाठी आयोगाने जिल्हा स्तरावर समित्या स्थापन केल्या आहेत. त्या समित्या स्वत:हून आणि तक्रार आल्यानंतर खात्री करून निर्वाचन अधिकाऱ्याला ही बाब निदर्शनास आणून देतात. मग संबंधित उमेदवारांना नोटीस बजावली जाते. त्याला उत्तर देण्यासाठी तीन ते सात दिवसांपर्यंत कालावधी दिला जात असून राज्य समितीकडे अपिलाचीही तरतूद आहे. उमेदवाराचे स्पष्टीकरण पटल्यास नोटीस रद्दबातल होऊ शकते. मात्र पेड न्यूजच्या निष्कर्षांवर राज्य समितीनेही शिक्कामोर्तब केले तरी हा खर्च उमेदवाराच्या निवडणूक खर्चात समाविष्ट करण्यापलीकडे फारशी कारवाई करता येत नाही, असे आयोगातील सूत्रांनी सांगितले. सर्वाधिक तक्रारी व नोटिसा राज्यात भंडारा-गोंदिया मतदारसंघात असून तेथे ७० तक्रारी आल्या असल्याचे संबंधितांनी स्पष्ट केले.
 
 
'पेड न्यूज'च्या उगमस्थानी ना नोटीस, ना कारवाई!
 
नांदेड हे 'पेड न्यूज'चे उगमस्थान. २००९ मध्ये येथून सुरू झालेले हे लोण फोफावले. मात्र, गुरुवारी पार पडलेल्या लोकसभा निवडणुकीत पेड न्यूजप्रकरणी एकही ठोस स्वरुपाची तक्रार नोंदली गेली नाही किंवा वृत्तपत्रातील मजकुरांचे अवलोकन करून पेड न्यूजप्रकरणी मूल्यांकन करणाऱ्या समितीने एकही नोटीस बजावलेली नाही.
विधानसभा निवडणुकीनंतर तत्कालिन मुख्यमंत्री व काँग्रेसचे नेते अशोक चव्हाण यांना पेड न्यूज प्रकरणात आरोपीच्या पिंजऱ्यात उभे राहावे लागले. २०१० मध्ये पत्रकार पी. साईनाथ यांनी बाहेर काढलेले हे प्रकरण देशभर गाजले. आजही ते न्यायप्रविष्ट आहे. पण त्यामुळे चव्हाण यांना निवडणूक लढविण्यासाठी बाधा निर्माण झाली नाही. विलक्षण नेटाने आणि प्रचंड माहिती संकलित करून हे प्रकरण लावून धरणारे पी. साईनाथ 'द हिंदू' या दैनिकातून काही दिवसांपूर्वी मुक्त झाले आहेत. मात्र, त्यांनी केलेल्या पाठपुराव्यामुळे प्रेस कौन्सिलला नांदेडच्या पेड न्यूज प्रकरणात लक्ष घालावे लागले. पेड न्यूज संदर्भात आयोगाने सुस्पष्ट सूचना दिल्याने या निवडणुकीत काँग्रेस उमेदवारांसह बहुसंख्य उमेदवारांनी ताकही फुंकून प्यावे एवढी काळजी घेतली. अर्थात वृत्तपत्रात आलेला मजकूर अशोकरावांच्या नावानेच अधिक भरलेला आहे. मात्र, १०० हून अधिक प्रचारफेऱ्या व भाषणांमुळे त्यांना प्रसिद्धी अधिक मिळाली. प्रसिद्धी पत्रके एकाच मजकुराची असू नये, याची काळजीही काँग्रेसने घेतली होती. त्यामुळे ते पेड न्यूजच्या कारवाईत अडकले नाहीत. सपाचे उमेदवार बालाजी शिंदे यांनी प्रचाराच्या पहिल्या टप्प्यात पाच-सहा वर्तमानपत्रांची नावे नमूद करून तक्रार दिली होती. मात्र निवडणूक यंत्रणेने कारवाई केली नाही. ना भाजपने तक्रार नोंदविली, ना काँग्रेसने. मागील कटू अनुभव लक्षात घेता अशोकराव चव्हाण आणि त्यांची यंत्रणा या बाबतीत अधिक सजग होती. या यंत्रणेत एक विधिज्ञ होता, हे विशेष.  दैनंदिन खर्चावर देखरेख ठेवण्यासाठी एक सनदी लेखापालही कार्यरत होता. भाजपच्या उमेदवाराने त्यांच्या नियोजनाची यंत्रणा जावयाकडे सुपूर्द केली होती. त्यामुळे त्यांच्या प्रसिद्ध मजकुरावर फारसे कोणाचे लक्ष नव्हते. चव्हाणांना मात्र रोज बातम्यांच्या कात्रणांचा संच आवर्जून दाखविला जात असे.
(संदर्भ सौजन्य : लोकसत्ता)

मंगळवार, २२ एप्रिल, २०१४

जळगावातील साठ वर्षे जुने वृत्तपत्र कात टाकणार!


जळगावातील साठ वर्षे जुने दैनिक असलेले 'जनशक्ती' लवकरच कात टाकणार आहे. या दैनिकाच्या मालकीचे हस्तांतरण नुकतेच पूर्ण झाले आहे. मूळचे जळगाव जिल्ह्यातील भुसावळ येथील असलेले पुण्यातील सिद्धीविनायक ग्रुपचे कुंदन ढाके या तरूण उद्योजकाने या खानदेशातील पत्रकारितेच्या उज्ज्वल वारशाला जतन करण्याचा, फुलविण्याचा आणि ज्या मातीत जन्मले तिचे पांग फेडण्याचा संकल्प सोडला आहे. वेगळ्या क्षेत्रात असले तरी पत्रकारितेच्या आवडीतून त्यांनी 'जनशक्ती'ला उर्जितावस्था आणून देण्याचे ठरविले आहे. 

कुंदन ढाके हे केंद्र शासनाच्या महिला व बालकल्याणसंबंधातील शासकीय समितीचे उपाध्यक्ष आहेत. (Vice President, NIPCCD,Ministry of Woman And Child Dev.,Govt of India) सिदधीविनायक समूह रिअल इस्टेट, कृषीउद्योग, शिक्षण आणि इंजीनिअरिंग या क्षेत्रात कार्यरत असून वेगाने विस्तारात आहे. सिद्धीविनायक स्कायस्क्रेपर्स ही पुण्यातील विश्वार्साह बिल्डर फर्म मानली जाते. हात घालेल तिथे सोने करेल, असे या समूहाचे आजवरचे कार्य आहे. 
जनशक्ती दैनिकाचे पहिल्या टप्प्यात जळगावात मजबुतीकरण आणि उर्जीकरण याला प्राधान्य दिले जाणार असल्याचे समजते. त्यानंतर पुणे, मुंबई आणि नाशिक व इतरत्र टप्प्याटप्प्याने विस्तार करण्याचीही योजना आहे. याशिवाय मुंबईत वेगवान व वृत्तपत्रजगतात धमाल उडवून देईल, अशा प्रोजेक्टवरही हा समूह काम करीत आहे. हा प्रोजेक्ट म्हणजे नव्या जमान्यातील माध्यमातील मैलाचा दगड ठरावा, असे 'स्मार्ट' पाउल असेल. खूप काही करायचे असले तरी त्यात कुठलीही घाई ण करता सातत्य वं विश्वार्साहतेला प्रथम प्राधान्य देण्याचेच समूहाचे धोरण असेल. माध्यम व्यवसाय हा इतर सर्व व्यवसायांपासून पूर्ण अलिप्त व स्वतंत्र ठेवला जाणार आहे. माध्यम प्रोजेक्टमध्ये पूर्ण प्रोफेशनलीझम राखले जाणार असून इतरांपेक्षा वेगळा ठसा उमटवणारे, समाजाशी नाळ जोडणारे वृत्तपत्र देण्यावर सारा भर राहील. लवकरच जळगावातील पत्रकारितेच्या मुख्य प्रवाहातील दोन कल्पक व 'दादा' माणसे या प्रोजेक्टशी जुळणार असल्याचीही चर्चा आहे. 
खानदेशातील संक्षिप्त माध्यम इतिहास 

धुळे जिल्ह्यात जळगावचा समावेश असताना 1868 साली गणपत बहाळकर वैद्य यांनी सुरू केलेल्या ‘खान्देश वैभव’ (पहिले संपादक बळवंत करंदीकर) या शिळा प्रेसवर छपाई होत असलेल्या वृत्तपत्रानंतर  तब्बल 13 वर्षांनी जळगावात ‘प्रबोधचंद्रिका’ नावाने नानासाहेब फडणीस यांनी वृत्तपत्र सुरू केले. त्यानंतर दुसरया दिवशी (4 जानेवारी) लोकमान्य टिळकांनी ‘केसरी’ सुरू केला होता. ‘ प्रबोधचंद्रिका’ शिळाप्रेसवर छापले जात होते. त्या वेळी लोकमान्यांचा राष्ट्रवाद खान्देशात प्रबोधचंद्रिकेच्या माध्यमातून रुजला. 1868 ते 1935 दरम्यान तालुकास्तरावरूनही अनेक छोटी मोठी साप्ताहिके सुरू झाली. जळगावात विठ्ठल चावदस नेहेते यांनी 1 नोव्हेंबर 1935 ला ‘बातमीदार’ सुरू केले. सुरुवातीला ते साप्ताहिक होते परंतु 1953 ते 54 पासून ते दैनिक झाले. या काळात मराठी मुलूख सोडून बातमीदारचे अंक अमेरिका, जर्मनीत राहणारे महाराष्ट्रीयन लोकही मागवत होते. त्यामुळे त्याचा खप 27 हजारांपर्यंत पोहोचला होता. 1935 ते 1965 हा कालखंड जळगावसाठी लक्षणीय ठरला. या काळात 100 नियतकालिके जळगाव जिल्ह्यातून निघायला लागली होती. 17 जानेवारी 1956 ला ‘जनशक्ती’ची सुरुवात जळगावात झाली. 1968 मध्ये ‘गावकरी’ सुरू झाला. 1 एप्रिल 1975 ला नागपूरहून ‘लोकमत’ची खान्देश आवृत्ती सुरू झाली. 15 डिसेंबर 1977 रोजी जळगावहून लोकमतची छपाई सुरू झाली. 17 मार्च 1990 रोजी ‘सकाळ’ नाशिकहून सुरू झाला. त्या वेळी जळगाव आवृत्तीही नाशिकहून निघत होती. 11 आगस्ट 2004 ला सकाळची जळगावहून खान्देश आवृत्ती सुरू झाली. दरम्यान, 24 डिसेंबर 1997 ला जळगावात देशदूतही दाखल झाला. त्यानंतर 11 सप्टेंबर 2011 रोजी ‘दिव्य मराठी’चे जळगावात आगमन झाले. 

(इतिहास संदर्भ : जितेंद्र झंवर, मुख्य उपसंपादक, दिव्य मराठी - जळगाव # https://plus.google.com/114687268910252020390/posts/JmnAutijJ8f)
सिद्धीविनायक गृपविषयीची अधिक माहिती खालील लिंकवर पाहा - 

शुक्रवार, १८ एप्रिल, २०१४

मुंबईतील 'सकाळ'चे पत्रकार तुषार खरात यांना बेदम मारहाणीचा निषेध

माण-खटावचे आमदार जयकुमार गोरे यांचे बंधू व माण पंचायत समितीचे सदस्य शेखर गोरे यांनी 17 एप्रिल रोजी पांढरवाडी ता. माण येथील मतदान केंद्रात घुसून मुंबईतील 'सकाळ'च्या विशेष शोध पथकाचे (SIT) ब्युरो चीफ तुषार खरात यांना बेदम मारहाण केली. या दडपशाहीचा मुंबईसह राज्यातील सर्व पत्रकारांनी निषेध केला आहे. वाळू माफियांची दंडेली हे सरकार कुठवर सहन करणार आहे, असा प्रश्न यानिमित्ताने उपस्थित केला जात आहे. पांढरवाडी ता. माण येथील बाबूलाल मुलाणी यांच्या पत्नी पांढरवाडी या गावच्या ग्रामपंचायत सदस्य आहेत. त्यांनी राजीनामा द्यावा यासाठी शेखर गोरे यांनी काही दिवसांपासून बाबू मुलाणी यांच्याकडे तगादा लावला होता. बरयाच दिवसांपासून ही धुसफूस चालू होती. 17 एप्रिल रोजी संध्याकाळी सुमारे सव्वा पाचच्या सुमारास गोरे पन्नास कार्यकर्त्यांसह पांढरवाडी येथील मतदान केंद्रात घुसले. यावेळी मुलाणी मतदान करण्यासाठी केंद्रात गेले होते. गोरे व त्यांच्या कार्यकर्त्यांनी अर्वाच्य भाषेत शिवीगाळ करत मुलाणी यांना बेदम मारहाण करण्यास सुरुवात केली. यावेळी पत्रकार तुषार खरात हे ही मतदान केंद्रावर उपस्थित होते. त्यांनी मध्यस्थी करण्याच्या प्रयत्न केला असता त्यांनाही मारहाण करण्यात आली आहे. शेखर गोरे यांनी सुमारे पन्नास जणांचा जमाव मतदान केंद्रात घुसवल्याने गावात दहशतीचे वातावरण निर्माण झाले. तसेच गोरे यांनी जमावबंदी, दहशत पसरवणे या आदेशाची पायमल्ली केली. तुषार खरात (9821288622) यांना 'बेरक्या'चा पाठिंबा व या भ्याड मारहाणीचा निषेध!

सोमवार, १४ एप्रिल, २०१४

महाराष्ट्रनामा ...

अकोला दिव्य मराठीचे निवासी संपादक म्हणून सचिन काटे रूजू.
काटे यांनी यापूर्वी सकाळचे मुख्य उपसंपादक, पुण्यनगरीचे संपादक म्हणून काम पाहिले आहे. त्यानंतर ते पुन्हा सकाळ मध्ये सहयोगी संपादक म्हणून रूजू झालेत. काही महिन्यांपूर्वी सकाळने सहयोगी संपादक म्हणून अकोल्यात त्यांना पाठवले. पण चांगली संधी मिळाल्याने काटे दिव्यकडे आलेत. राठोडांनी केलेल्या नुकसानीची भरपाईची जबाबदारी त्यांचेवर आहे. अमरावतीची सर्व जबाबदारी त्यांचेकडे असेल. काटे आल्याने दिव्य मधील पूर्ण टीमने सुटकेचा श्वास घेतलाय. माणुसकीने विचार करणारा माणूस अशी काटे यांची ओळख आहे.
 




मुंबई 'पुढारी'तून वरिष्ठ उपसंपादक दीपक निकम यांचा वरिष्ठांच्या जाचाला कंटाळून राजीनामा, 'सकाळ'च्या आश्रयाला.

ठाणे :  रिपोर्टर मोहिनी धुमाळ यांचा पुढारीला रामराम. मी मराठीत रुजू. आणखी एक रिपोर्टर लोकसत्ताच्या वाटेवर....



शनिवार, १२ एप्रिल, २०१४

लोकमत कर्मचाऱ्यांचा मदतीचा हात

राज्यातल्या गारपीटग्रस्त शेतकरयांवर आलेले संकट आणि त्यातून न भरुन येणारे झालेले नुकसान लक्षात घेता लोकमतच्या सर्व कर्मचारयांनी आपले एक दिवसाचे वेतन देण्याचा निर्णय घेतला होता. कर्मचारयापासून संचालकांपर्यंत सगळ्यांनी आपले एक दिवसाचे वेतन यासाठी दिले आहे. १७ लाख ६० हजार रुपयांचा हा धनादेश आज मुख्यमंत्री सहाय्यता निधीसाठी म्हणून देण्यात आला. मुख्य सचिव सहारिया आणि मुख्यमंत्री पृथ्वीराज चव्हाण यांचे सचिव विकास खारगे यांच्याकडे लोकमतचे समूह संपादक दिनकर रायकर आणि वरिष्ठ महाव्यवस्थापक (एचआर) बी.ए. मुळे यांच्या हस्ते सूपूर्त करण्यात आला. यावेळी सहाय्यक संपादक अतुल कुलकर्णी, उपव्यवस्थापक सचिन लिगाडे, अमोल निला, रुपसिंग राजपूत यांचीही उपस्थिती होती.

गुरुवार, १० एप्रिल, २०१४

भोपाळशेठला हवे आहेत,दोन निवासी संपादक

औरंगाबाद / अकोला - दिव्य मराठीच्या औरंगाबाद आवृत्तीचे निवासी संपादक धनंजय लांबे आणि अकोला आवृत्तीचे निवासी संपादक प्रेमदास राठोड यांना भोपाळशेठने काही दिवसांपुर्वी भोपळा दिला.त्यानंतर लांबे म.टा.मध्ये आणि राठोड लोकमतमध्ये गेले.परंतु भोपाळशेठला नवा पर्याय अजूनही शोधून सापडला नाही.
भोपाळशेठच्या औरंगाबाद आवृत्तीसाठी लोकमतचे एक माजी कार्यकारी संपादक,एक माजी दिल्ली प्रतिनिधी आणि सकाळचे एक अडगळीत पडलले कार्यकारी संपादक इच्छुक आहेत.परंतु भोपाळशेठला नवा दमाचा निवासी संपादक हवा आहे.अकोला आवृत्तीचही तीच बोंब आहे.या आवृत्तीसाठी सकाळचे  एक निवासी संपादक सोडले तर कोणीच इच्छुक नाही.
औरंगाबाद आवृत्तीसाठी इच्छुक असलेल्या काही जणांनी भोपाळला जावून भोपाळशेठची भेट घेतली.मुलाखती दिल्या परंतु  पुढे काहीच नाही.घोडे कशात अडले आहे,हे कोणालाच माहित नाही.असो,लवकरात लवकर भोपाळशेठला नवे निवासी संपादक मिळो,हीच शुभेच्छा.

बुधवार, ९ एप्रिल, २०१४

रहस्यकथाकार गुरुनाथ नाईक यांची व्यथा...

पुस्तकांची थोडीफार माहिती असणाऱ्या पन्नाशीतल्या पुरुषांपुढे गुरुनाथ नाईक हे नाव उच्चारलं तरी ते ओसंडून बोलू लागतात. कॅप्टन दीप, शिलेदार, गरुड कथा, धुरंदर कथा, शब्दवेदी, रातराणी अशा रहस्यकथांची यादी सांगू लागतात. शौर्य, गुप्तहेरी आणि गुन्हे जगताला फॅन्टसीचा साज चढवणाऱ्या या लेखकावर वाचक वेड्यासारखे प्रेम करतात. रहस्यकथांच्या पोशिंद्याला एकदा तरी भेटण्याचं अनेकांचं स्वप्न असतं. असे लोकप्रियतेचा आयाम स्थापन करणारे रहस्यकथाकार गुरुनाथ नाईक आज स्वतः तारणहाराच्या प्रतीक्षेत आहेत. गोवा सरकारने घर दिल्याने डोक्‍यावर छप्पर आहे. पण दोन वेळच्या अन्नाचं काय? हा प्रश्‍न नाईक दांपत्याला सतावतो आहे. वयाची पंचाहत्तरी गाठलेली. सोबतीला फक्त बायको आणि मानेचं जीवघेणं दुखणं. शारीरिक अस्वास्थ्यामुळे घराचा उंबरा ओलांडण्याचीही धास्ती. दुखण्यामुळे लिखाणाचा वेग मंदावलेला. त्यामुळे रोजीरोटीचं साधन संपल्यात जमा. अशावेळी आयुष्याची कमाई कामी यायला हवी. पण लेखन आणि पत्रकारितेच्या क्षेत्रानं त्यांची झोळी रितीच ठेवली. चार रुपयांच्या मानधनावर रहस्यकथा लिहिल्या. तर अवघ्या काही हजार रुपयांच्या मानधनावर पत्रकारिता केली. त्यामुळे गाठीशी कसलीच गुंतवणूक नाही. आज त्यांना दिवस ढकलण्यासाठीही रेशनिंगच्या तांदळाची वाट पाहावी लागते. दैनिकांच्या साप्ताहिक आवृत्तीतील लघुकथांच्या माध्यमातून नाईक यांच्या लेखनाला सुरवात झाली. सत्तरच्या दशकात शंभरहून अधिक लघुकथांनी त्यांनी वाचकांना आपलंसं केलं. दै. "गोमन्तक'च्या साहाय्यक संपादकपदाची धुरा सांभाळत असतानाच नाईक यांचा लेखनाचा प्रवास सुरू झाला. त्यांनी 1970 साली प्रकाशक सदानंद खाडीलकरांना "मृत्यूकडे नेणारे चुंबन' ही पहिली रहस्यकथा दिली. या कथेने प्रकाशकांनाही भारावून सोडलं आणि मराठीतील नव्या रहस्यकथांचा प्रवास सुरू झाला. लष्करातील जगण्याचं आकर्षण, दोन सख्ख्या भावांच्या जगण्यातील अनुभव यांच्या आधारावर "कॅप्टन दीप'चा नायक जन्माला आला. हा "कॅप्टन दीप' तत्कालीन युवा पिढीचा आदर्श ठरला. सत्तरच्या दशकातील शास्त्रज्ञांच्या मृत्यूचे गूढ या कादंबरीपासून 2009 साली आलेल्या "स्वर्ग आणि नरक' या कादंबरीपर्यंत गुरुनाथ नाईकांच्या लिखाणाने वाचकांचं कल्पनाविश्‍व व्यापून टाकलं. चौकट पोतुर्गिजांच्या जुलूमाने विस्थापित कुटुंब गुरुनाथ नाईक मूळचे विठ्ठलापूरचे राणे. पोर्तुगिजांकडून धर्मांतराच्या भीतीने कुटुंबाने गोवा सोडला. तरी आजोबा पोर्तुगिजांकडूनच मारले गेले आणि आजीने पुन्हा गोवा गाठला. साखळीमध्ये नाईक यांच्या आजीचे घर आहे. पण तेही स्वतःच्या नावावर नसल्याने त्यांना हक्क सांगता येत नाही. महाराष्ट्र आणि गोव्याच्या साहित्य सेवेत तब्बल चाळीसहून अधिक वर्षे नाईक यांनी योगदान दिले. पण दोन्ही पैकी एका तरी सरकारला आपली दया येईल, या आशेवर ते जगत आहेत.
.................
त्यांच्या लिखाणाने वाचकांच्या पिढ्या घडवल्या. युवा वर्गाचं पुस्तकांशी नातं जोडलं. तब्बल 1208 कादंबऱ्या लिहीत लिम्का बुकात मराठीची पताका फडकवली. पण साहित्याचा डोंगर उभा करणारे गुरुनाथ नाईक आज अन्नासाठी मोहताज झालेत. गोवा, महाराष्ट्र आणि कर्नाटकात लाखोंच्या संख्येने चाहते असणारा हा लेखक केवळ उपेक्षेचा धनी ठरला आहे. रहस्यकथाकार गुरुनाथ नाईक यांची व्यथा...


.....................................

गुरुनाथ नाईक यांना मदत करण्यासाठी .
गुरुनाथ विष्णू नाईक -स्टेट बैंक आफ इंडिया -शाखा पणजी -खाते नंबर -31180667793 . 
आवशकता लागल्यास अनिल पाटील (पणजी) यांना फोन करू शकता -9422042054 / 9405921771

शुक्रवार, ४ एप्रिल, २०१४

आणखी एका वाहिनीत महिलेशी गैरवर्तणूक!

नुकत्याच आत्महत्या केलेल्या तरुण अभिनेत्रीच्या नावाशी साधर्म्य असलेल्या एका हिंदी वाहिनीतही महिलेशी गैरवर्तणुकीचा प्रकार उघड झाला आहे. या वाहिनीजवळ स्वत:चे काहीही नाही. सर्व काही भाड्याचे आहे. अशात या वाहिनीच्या विक्रीचीही चर्चा सुरू आहे. आता हे नेमके काय विकणार? त्यांच्याजवळ स्वत:चे काही नाहीच आहे! नोएडातून सूत्रे चालविली जात असलेल्या या वाहिनीच्या मुंबईतील महिला पत्रकाराशी अभद्र व्यवहाराची घटनाही नुकतीच घडली होती; पण ती कार्यालयाबाहेर इतरांकडून! मात्र, कार्यालयाच्या आत वरिष्ठ छळत असल्याची तक्रार एका महिलेने केल्याने इथे धरपकड होण्याची शक्यता आहे.

या महिलेवरच व्यवस्थापनाकडे दिलेली अंतर्गत तक्रार मागे घेण्याचा दबाव होता. तिलाच बाहेरचा रस्ता दाखविण्याची तयारी सुरू होती. त्यामुळे चवताळलेल्या महिलेने महिला आयोग, मानवाधिकार आयोग यांच्याकडे तर तक्रार केलीच; पण पोलिसात तक्रार करुन एफआयआर नोंदविण्यासाठी आग्रह धरला आहे. हा गुन्हा नोंद झाल्यास अनेकजण अडचणीत येतील व वाहिन्यांच्या दुनियेतील 'घाण' जगासमोर येईल.

आघाडीच्या दोन मराठी वाहिन्यांमध्येही महिलांशी गैरवर्तणुकीचे किस्से घडले होते; पण त्यात 'मिटवामिटवी' केली गेली. नवी मुंबईत सानपाड्यात एका दैनिकातही असाच प्रकार घडला होता. इतकी छी-थू होवूनही हे 'चिराग'दिवाणे म्हातारचळ काही सोडायला तयार नाहीत. इथेही पोलिसात दाखल केली गेलेली तक्रार 'पोलीसबॉइज' वार्ताहराच्या कृपेने दाबण्यात आली आहे. शिवाय 'रंगीला' म्हातारयाच्या उलव्यातील पंटर दलालाने संबंधित महिलेची शैक्षणिक क्षेत्रातील संबंध वापरून तात्पुरती समजूत काढली आहे.

असो. विषय होता हिंदी वाहिनीतील छळाचा! या वाहिन्यांचे जगच अगदी 'विनोद' आणि 'नवीन' गोष्टींनी भरलेले आहे. बाहेरचे लोक 'एक्स्प्रेस' वेगाने इथे येतात. आता या वाहिनीचेच घ्या ना! इथेही  'एक्स्प्रेस' वेगाने बाहेरील माणसे आली; पण 15 दिवसात त्यांना म्हणजे बाहेरून आलेल्या सर्वांना व्यवस्थापनाने बाहेरचा रस्ता दाखविला! त्यात थोडीशी सुधारणा अशी की, नागपूर दौरा आटोपून आलेल्या काही अतिवरिष्ठांना जीवदान दिले गेले; त्यांच्यासोबत आलेली टीम मात्र आऊट, बेरोजगार! फक्त दोघा साहेबांना जीवदान! आहे की नाही 'विनोद'पूर्ण आणि 'नवीन' अशी ही गोष्ट!

खरेतर असे म्हटले जाते की या हिंदी वाहिनीच्या नोएडा कार्यालयातील मंडळींमध्ये काही 'धीरज' म्हणजे संयम नावाचा गुणच नाही. सारे म्हणजे मनमौजी; जणू घरी 'दिवान'वर बसून 'जॉय' करायला आलेहेत! भाड्याच्या लायसन्सवर सुरू असलेल्या या वाहिनीला एक खरीददार मिळाला असून लवकरच नोएडा कार्यालयात विक्री बैठक होण्याची शक्यता आहे. महिला कर्मचारीच्या तक्रारीवर एफआयआर दाखल होवून धरपकड व बदनामी सुरू होण्याच्या आत हा भाड्याचा खेळ विकून मोकळा व्हावा, म्हणून मालक प्रयत्न करीत आहेत. त्यांना निव्वळ पैसे आणून देण्याची मोठमोठी आश्वासने देणारया भंपक च्यानेली पत्रकारांवर पोलिसी कारवाईचा आनंदच आहे; पण हे सारे एकदा ही झंझट विकून मोकळे झाल्यावर! तोवर ते त्या महिलेला हाय रे मेरे 'जिया' म्हणून कळ काढण्याचा सल्ला देत आहेत! हा वाहिनीची मुंबईतील पालखी ओढून नेणारे 'भोय'ही (भोईचा बोलीभाषेतील अपभ्रंश) या एकूण घटनाक्रमामुळे चिंतीत आहेत. अरेरे, काय ख नाय!

मंगळवार, १ एप्रिल, २०१४

कृषी मासिक 'अॅग्रो वर्ल्ड'चे जळगावात प्रकाशन

कृषी मासिक 'अॅग्रो वर्ल्ड'चे जळगावात प्रकाशन गुढीपाडवाच्या मुहूर्तावर राज्यस्तरीय मराठी कृषी मासिक 'अॅग्रो वर्ल्ड'चे (Agro World) जळगावात प्रकाशन करण्यात आले. जैन उद्योग समूहाचे संस्थापक-अध्यक्ष डॉ. भवरलाल जैन यांच्या हस्ते पहिल्या अंकाचे प्रकाशन झाले. यावेळी जैन समूहाचे जनसंपर्क व प्रसिद्धी अधिकारी विनोद रापतवार, 'अॅग्रोवर्ल्ड'चे संपादक शैंलेंद्र चव्हाण 9881300564, विवेक काळे, 'प्रल्शर बायोटेक'चे संचालक निखिल सुर्यवंशी, अनंत बागुल आदी उपस्थित होते. 64 पाने व बहुरंगी छपाईसह प्रत्येक महिन्यात महाराष्ट्रातील शेती व शेतकरी यांचा वेगळ्या पद्धतीने आढावा घेणारे 'अॅग्रो वर्ल्ड' मासिक कृषी व ग्रामविकासाच्या उन्नतीसाठी कटीबद्ध राहील, असा चव्हाण यांचा दावा आहे.

फेसबुक वर शेअर करा

Facebook