मुंबई: पत्रकारितेच्या वर्तुळातून एक मोठी आणि तितकीच धक्कादायक बातमी समोर येत आहे. 'जय महाराष्ट्र' न्यूज चॅनलचे संपादक म्हणून धुरा सांभाळणारे, आशुतोष पाटील, यांना अवघ्या सहा महिन्यांतच नारळ देण्यात आला आहे. त्यांच्या जागी वृषाली कदम-परब यांची वर्णी लागली आहे, ज्यामुळे माध्यम क्षेत्रात अनेकांच्या भुवया उंचावल्या आहेत.
'आऊटगोइंग' नंतर थेट 'इनकमिंग' संपादकपदी?
वृषाली कदम-परब याच 'जय महाराष्ट्र' चॅनलमध्ये पूर्वी प्रोड्युसर म्हणून कार्यरत होत्या आणि त्यांच्यावर 'महाफास्ट बुलेटिन'ची जबाबदारी होती. सूत्रांनी दिलेल्या माहितीनुसार, अवघ्या तीन महिन्यांपूर्वीच त्यांना 'काम करत नाहीत' या कारणास्तव चॅनलमधून बाहेरचा रस्ता दाखवण्यात आला होता. आता त्याच वृषाली कदम-परब थेट संपादक म्हणून पदभार स्वीकारल्याने आश्चर्य व्यक्त केले जात आहे. 'ज्याला डच्चू, त्यालाच प्रमोशन?' असा सवाल आता चॅनलच्या कर्मचाऱ्यांमध्येच विचारला जात आहे.
महिला संपादकांच्या पंक्तीत आणखी एक नाव?
महाराष्ट्रात सध्या आठ प्रमुख न्यूज चॅनल कार्यरत आहेत. 'एबीपी माझा'च्या संपादक म्हणून सरिता कौशिक या खंबीरपणे आपली जबाबदारी सांभाळत आहेत. आता वृषाली कदम-परब यांच्या रूपाने मराठी वृत्तवाहिनीला आणखी एक महिला संपादक मिळाल्या आहेत., सरिता कौशिक यांच्यानंतर वृत्तवाहिनीचे संपादकपद भूषवणाऱ्या त्या दुसऱ्या महिला ठरल्या आहेत.
'बेरक्या'ची टिप्पणी:
'जय महाराष्ट्र' चॅनल आणि वाद हे काही नवीन समीकरण नाही. यापूर्वीही अनेकदा हे चॅनल आर्थिक अडचणी आणि इतर कारणांमुळे चर्चेत राहिले आहे. आता संपादकीय पातळीवरील हा 'ब्रेकिंग' बदल चॅनलच्या भविष्यासाठी किती फायदेशीर ठरेल, हे येणारा काळच ठरवेल. मात्र, एका गोष्टीचे कौतुक करावे लागेल, ते म्हणजे वृषाली कदम-परब यांना मिळालेली संधी. एका महिलेला, विशेषतः ज्यांना काही काळापूर्वी बाहेरचा रस्ता दाखवला गेला होता, त्यांना थेट संपादकपदी बसवणे, हे धाडसाचेच म्हणावे लागेल. या 'खेळी'मागे नेमके काय राजकारण आहे, याचा उलगडा लवकरच होईल, अशी आशा आहे. तोपर्यंत, मीडिया वर्तुळातील या 'गरमागरम' बातमीवर लक्ष ठेवून राहूया!
0 टिप्पण्या