देशातील वृत्तपत्रांच्या नोंदणीची सर्वोच्च संस्था असलेल्या "आरएनआय' म्हणजेच "रजिस्ट्रार ऑफ न्यूजपेपर्स इन इंडिया'च्या "प्रेस इन इंडिया' या ताज्या अहवालानुसार, एका आवृत्तीच्या सर्वाधिक खपाच्या भाषिक वृत्तपत्रांच्या (हिंदी, इंग्रजी वगळून उर्वरित) भारतातील "टॉप टेन'च्या यादीत स्थान पटकावण्याचा मान मराठी वृत्तपत्रांमध्ये केवळ "सकाळ'च्या पुणे आवृत्तीला मिळाला आहे. या श्रेणीत प. बंगालमधील "आनंदबझार पत्रिका' आणि "बर्तमान' या दैनिकांबरोबरच तीन हिंदी आणि चार इंग्रजी भाषिक दैनिकांचा समावेश आहे.
महाराष्ट्रात मराठी व अन्य भाषांत मिळून 904 नियतकालिकांच्या एकूण 2.29 कोटी प्रती प्रसिद्ध होतात. त्यापैकी पहिल्या 50 नियतकालिकांमध्ये "सकाळ'च्या पुणे, कोल्हापूर, औरंगाबाद, मुंबई आणि नाशिक या "लखपती' आवृत्त्यांचा समावेश आहे
देशातील एकूण दैनिकांपैकी हिंदी वृत्तपत्रांचे दैनिक वितरण 47.71 टक्के आहे. दुसऱ्या क्रमांकावरील इंग्रजी दैनिकांचा खप 11.40 टक्के आहे. मराठी दैनिके उर्दू व तेलुगू भाषांनंतर पाचव्या स्थानी आहेत, असे अहवालातील आकडेवारी सांगते.
