> बेरक्याला माहिती देण्यासाठी ई - मेल करा - berkya2011@gmail.com

शनिवार, २९ जून, २०१९

हेमंत अलोने यांना जळगाव 'देशदूत'मधून 'निरोप'

जळगाव - गेली अनेक वर्षे जळगाव, खान्देश 'देशदूत'च्या कार्यकारी संपादकपदावर ठाण मांडून बसून असलेले हेमंत अलोने यांना अखेर जळगाव 'देशदूत'मधून काल 'निरोप' देण्यात आला. महाव्यवस्थापक विलास जैन यांनी त्यांच्या हाती 'श्रीफळ' सोपविले. अलोने हे आता 1 जुलैपासून नाशिक मुख्यालयात कार्यकारी संपादक वैशाली बालाजीवाले यांच्या मार्गदर्शनात देशदूत रौप्य महोत्सवी पुरवणीच्या जाहिरातींचे काम पाहणार असल्याचे सांगितले जात आहे.
 
 गेल्या काही वर्षातील तीव्र माध्यम स्पर्धेत अंकाचे रुपडे व कंटेंटचा दर्जा यात काहीही बदल अलोने करू शकलेले नव्हते. त्यामुळे मालक विक्रमभाऊ सारडा यांच्यासह व्यवस्थापन त्यांच्यावर नाराज होते. 'देशदूत'मध्ये 'कंपूबाजी'लाही उत आला होता. अनेक 'सेटिंगबाज' वार्ताहरांना प्रोत्साहन देवून अलोने यांनी ब्रांडचे नावही खराब करून ठेवले होते. 'दिव्य मराठी'तून आलेल्या जैन यांनी या विस्कळीत युनिटमध्ये आर्थिक व प्रशासकीय शिस्त लावली. मात्र, संपादकीय विभागाच्या सुधारणात त्यांना अलोने सहकार्य करत नव्हते. चांडाळ-चौकडीच्या मदतीने त्यांनी सुधारणांमध्ये अडथळे आणण्याचा प्रयत्न सुरूच ठेवला होता. अखेर अलोने यांचे काही खासम-खास साथीदार यांची इतरत्र रवानगी करण्यात आली व नंतर त्यांनी राजीनामेही दिले. 

दरम्यानच्या काळात जाहिरातींचे पेमेंट पार्टीने अदा केलेले मात्र संस्थेत भरणा नसल्याचे प्रकार उघड झाले. संपादक कमी आणि वितरण, जाहिरात वसुली प्रतिनिधी म्हणून दौरेच अधिक अशी भूमिका निभावणार रे अलोने या थकबाकी घोटाळ्यामुळे अडचणीत आले. अनेक 'सोय-पाणी' करणारे वार्ताहरच थकबाकीदार आढळून आले. शहरात गेल्या 15 वर्षांत अंक वाढ तर सोडाच पण समाधानकारक संख्याही स्थिर ठेवू न शकणारा नाना-मामा काही कामाचे नाही, हे मालकांच्या ध्यानात आले. त्यामुळे जळगाव जिल्ह्याच्या पत्रकारितेतील मोठी 'दुकानदारी' व गावोगावची अनेक दुकाने आता बंद होणार आहेत. त्यातच अलीकडे एचडीएफसी बँकेत अमरावती येथील बनावट कागदपत्रे देवून, कृषी व्यवसाय दाखवून क्रेडिट कार्ड लाटण्याचे प्रकरण समोर आले. 

कार्डवर थकबाकी वाढल्याने व अवास्तव लीकर स्वाईपिंग झाल्याने बँकेच्या रिकव्हरी टीमने शोध घेतला. त्यात बनावट कागदपत्रे उघड झाली. एका डॉकटर प्राध्यापकाने यात मदत केल्याचे समजते. बँकेने यात फौजदारी गुन्हा दाखल करण्याचा पवित्रा घेतला होता. मात्र, मालकांच्या मेहेरबानीमुळे हे प्रकरण निस्तरले गेले.

गुरुवार, २७ जून, २०१९

प्रसाद काथे, विलास बडे, प्राजक्ता पोळ दोषी ...

चॅनलवर माफी मागण्याचा विशेषाधिकार समितीचा आदेश

मुंबई  : विधान परिषदेचे विरोधी पक्ष नेते धनंजय मुंडे व विधीमंडळाच्या कामकाजासंबंधी त्यांची बदनामी करणारे वृत्त प्रसारीत केले म्हणून विधीमंडळाच्या विशेषाधिकार समितीने (हक्कभंग) न्युज-18 लोकमत या मराठी वृत्तवाहीनीला दोषी ठरवत चॅनलने बिनशर्त माफीनामा मागावा असे आदेश दिले आहेत.  

सदर वृत्त दाखविल्या प्रकरणी तत्कालीन संपादक प्रसाद काथे, तत्कालीन वार्ताहर श्रीमती प्राजक्ता पोळ शिंदे, वृत्त निवेदक विलास बडे यांनाही समितीने दोषी ठरविले आहे. समितीसमोर त्यांनी लेखी माफी मागितल्यामुळे यापुढे अशा घटनांची पुनरावृत्ती होऊ नये अशी त्यांना समजही देण्यात आला आहे.तसेच  समितीसमोर कबूल केल्यानुसार न्युज-18 लोकमत या वृत्तवाहीनीचा बिनशर्त माफीनामा मराठी व इंग्रजी भाषेतून ठळक पध्दतीने ग्राफीक्स प्लेट्सवर सायंकाळी 7 ते रात्रौ 10.00 या प्राईम टाईम मध्ये वारंवार प्रसिध्द करावा व या प्रक्षेपणाची सिडी समितीला सादर करावी असे आदेश दिले आहेत.

न्युज-18 या मराठी वृत्तवाहीनीचे संपादक, वार्ताहर व सुत्रसंचालक यांनी या वृत्तवाहीनीच्या 28 फेब्रुवारी, 2018 रोजी महागौप्यस्फोट या मथळ्याखाली प्रसिध्द केलेल्या बातमीसाठी विधान परिषदेच्या कार्यवाहीचा भाग झालेल्या लक्षवेधी सुचनेची प्रत अवैधरित्या प्राप्त करुन ती बेकायदेशीरपणे वृत्तवाहीणीवर प्रसारीत करुन त्यासंदर्भातील कार्यवाहीची अधिकृत व खात्रीशीर माहिती न घेता, माहितीची सत्यता न तपासता विधान मंडळ सदस्यांना त्यांच्या कर्तव्यापासून परावृत्त करण्यासाठी त्यांच्या संसदीय कामकाजाबाबत व कर्तव्यांबाबत अत्यंत आक्षेपार्हपणे विधान परिषदेच्या कार्यवाहीचा विपर्यास करणारे पुर्णत: असत्य व तथ्यहीन वृत्त वृत्त वाहीनीवर जाणीवपुर्वक प्रसारीत करुन त्याव्दारे विधानमंडळाची प्रतिष्ठा व सन्मान यांना हानी पोहचवून विधानमंडळाची प्रतिमा मलीन करण्याचा प्रयत्न केल्याने सदर हक्कभंग प्रकरण आमदार हेमंत टकले यांनी दाखल केले होते. या प्रकरणात विरोधी पक्षनेते धनंजय मुंडे, विधीमंडळाचे माजी प्रधान सचिव, अनंत कळसे, आमदार आनंद ठाकूर यांची बदनामी करण्यात आली होती.

सदर प्रकरण सभापतींनी दाखल करुन घेत हक्कभंग समितीकडे दिनांक 1 मार्च, 2018 रोजी सादर केल्यानंतर समितीने त्याच्या 23 बैठका घेतल्या.  संबंधितांचे साक्षीपुरावे नोंदवून त्यासंदर्भातला अहवाल काल विधानपरिषदेत समितीचे सदस्य आमदार गिरीश व्यास यांनी सादर केला.

 न्युज-18 लोकमत या वृत्तवाहीनीने लिखित स्वरुपात तसेच समितीसमोर व्यक्तीश: सादर केलेली बिनशर्त माफी सभागृहाने औदार्याने स्विकारावी व ज्या दिवशी समितीचा हा अहवाल विधानपरिषद विचारात घेऊन स्विकारेल त्याच दिवशी संबंधित वाहीनीने म्हणजे न्युज-18 लोकमत व नेटवर्क-18 या वृत्तवाहीन्यांची संयुक्त वाहीनी असलेल्या न्युज-18 लोकमतच्या वृत्त वाहीनीवर या वाहीनीच्या प्रतिनिधींनी समितीसमोर कबूल केल्यानुसार न्युज-18 लोकमत या वृत्तवाहीनीचा बिनशर्त माफीनामा मराठी व इंग्रजी भाषेतून ठळक पध्दतीने ग्राफीक्स प्लेट्सवर सायंकाळी 7 ते रात्रौ 10.00 या प्राईम टाईम मध्ये वारंवार प्रसिध्द करावा व या प्रक्षेपणाची सिडी समितीला सादर करावी असे आदेश दिले आहेत.

ज्यावेळी कोणत्याही व्यक्तीवर किंवा लोकप्रतिनिधीवर वृत्तवाहीनी जाहीरपणे आरोप केले जातात त्यावेळी त्या आरोपांची खातरजमा करुन घेणे अत्यंत आवश्यक आहे.  विशेषत: लोकप्रतिनिधींवर आरोप करतांना त्यांचे म्हणने नोंदवून त्याची खात्री करुनच त्यांच्या अनुमतीने बातमीमध्ये प्रसारण करणे उचित ठरेल.  सर्व वृत्त वाहीन्यांनी अशा प्रकारच्या बातम्या देतांना काही निश्चित अशी मार्गदर्शक तत्व संहिता स्वत:साठी निर्माण करावी असेही समितीने सुचविले असून वृत्त वाहीन्यांनी विधानमंडळाचे कामकाज व विशेषाधिकार याबाबत अधिक सजग व्हावे असे सुचविले आहे.

एरंडाचे गुऱ्हाळ !

'उघडा डोळे, बघा नीट' म्हणणाऱ्या एबीपी माझा चॅनलला सावरकर डीबेट प्रकरणी अखेर माफी मागावी लागली, इतकेच काय तर गेल्या काही दिवसांपासून  माझा विशेष हा डिबेट शो बंद करावा लागला आहे.
मराठी न्यूज चॅनलवर होणाऱ्या डिबेट शो ला टीआरपी मिळत नाही, ही वस्तुस्थिती आहे. भविष्यात हे  एरंडाचे गुऱ्हाळ  सर्व चॅनल्सनी बंद केल्यास आश्चर्य वाटू नये.

ज्येष्ठ आणि नामवंत पत्रकार निखिल वागळे जेव्हा आयबीएन लोकमतला होते तेव्हा सुद्धा त्यांच्या 'आजचा सवाल' या डिबेट शो टीआरपी नव्हता.  नंतर वागळे मी मराठी, महाराष्ट्र 1, टीव्ही 9  मध्ये गेले तरीही  त्यांच्या डिबेट शोला टीआरपी मिळाला नव्हता.  वागळे मुख्य प्रवाहातून बाहेर पडल्यानंतर साम मध्ये संजय आवटे यांनी वागळे होण्याचा प्रयोग केला,पण टीआरपी 0 टक्के होता.  नंतर निलेश खरे आल्यानंतर आवटे मास्तरचा डिबेट शो  प्राईम टाईमवरून 5 वाजता करण्यात आला. आवटे गेल्यानंतर 'आवाज महाराष्ट्रचा' डिबेट  शो बंद करण्यात आला.उलट सामने डिबेट शो बंद करून खास बातम्या सुरू केल्यानंतर हे चॅनल नंबर 1 वर आले. तेव्हापासून साम 1 ते 3 मध्ये आहे.नंतर एबीपी माझा, टीव्ही 9 आदी चॅनल्सनाही डिबेट शो ला टीआरपी मिळत नसल्याचे लक्षात आल्यानंतर हा शो प्राईम टाईमवरून पाच वाजता केला. सावरकर डिबेट शो प्रकरणी एबीपी माझा तोंडावर पडल्यानंतर   माझाने डिबेट शो बंद केला. हळूहळू अन्य चॅनल्स डिबेट शो बंद करतील. 

फालतू विषय, तेच ते चेहरे, विरोधासाठी विरोध, हमरीतुमरी, रटाळ आणि कंटाळवाणी चर्चा यामुळे डिबेट शो किती लोक पाहतात ? हा एक गहन प्रश्न आहे. या चर्चेमधून काहीही निष्पन्न होत नाही.निरर्थक आणि कंटाळवाणा चर्चेला  ग्रामीण भागात एरंडाचे गुऱ्हाळ म्हणतात, मराठी न्यूज चॅनल्सवरील एरंडयाचे गुऱ्हाळ पाहणाऱ्याची संख्या टीव्ही पाहणाऱ्या संख्येच्या फक्त 1 ते 3 टक्का आहे. 

मुळात टीव्ही किती लोक पाहतात ? पाहिले तर न्यूज चॅनल्स किती लोक पाहतात ? महत्वाचे म्हणजे 6.30 ते रात्री 10.30 पर्यंत  टीव्हीचा रिमोट बायकांच्या हातात असतो. टीव्हीवर चालणाऱ्या मालिका बायकांच्या आवडीच्या असल्याने न्यूज चॅनल खूप कमी लोक पाहतात.

स्मार्ट फोनवर 4 जी इंटरनेट  स्पीड आल्यापासून बहुतांश लोक बातम्या मोबाईलवर पाहतात. वेबसाईट, अँप, फेसबुक, युट्युबच्या माध्यमातून लोकांना बातम्या कळतात. जे पेपर आणि चॅनल्स मजबूत कंटेंट देतील, तेच लोक पेपर वाचतील आणि टीव्ही चॅनल्स पाहतील.येत्या 5 वर्षात अनेक वृत्तपत्र आणि  चॅनल्स बंद पडतील, त्याची जागा डिजिटल माध्यमे घेतील, असा अनेकांचा अंदाज आहे.

एव्हडे मात्र खरे आहे की, मराठी न्यूज चॅनल्सवरील  एरंडाचे गुऱ्हाळ बंद झाल्यामुळे फक्त  टीव्हीवर चमकोगिरी करणाऱ्यांचे दुकान बंद झाले आहे. 

बेरक्या उर्फ नारद
पत्रकारांच्या बातम्या देणारा पत्रकार

बुधवार, २६ जून, २०१९

सावरकर प्रकरणी एबीपी माझाचे अखेर लोटांगण !

मागितली माफी ! माझा विशेषही बंद !

मुंबई - सावरकर प्रकरणी  एबीपी माझाने  अखेर लोटांगण घातले आहे. या प्रकरणी जाहीर माफी मागत माझा विशेष हा वादग्रस्त कार्यक्रमही बंद केला आहे. उघडा डोळे बघा  नीट  महणणाऱ्या एबीपी माझाला हा  मोठा झटका मानला जात आहे.

भारतीय स्वातंत्र्य लढ्यातील थोर क्रांतिकारक वि. दा. सावरकर यांची 28 मे रोजी जयंती असते. एक महिन्यापूर्वी सावरकरांच्या जयंती दिवशी "उघड़ा डोळे, बघा नीट" म्हणणाऱ्या "एबीपी माझा"ने "माझा विशेष" या चर्चात्मक कार्यक्रमात "सावरकर नायक की खलनायक" यावर चर्चा घडवली.  एका थोर  क्रांतीकारकाबद्दल खलनायक हे अवमानकारक शब्द वापल्यामुळे सावरकर प्रेमीमध्ये संतप्त प्रतिक्रिया उमटल्या होत्या.

या कार्यक्रमानंतर  एबीपी माझाला अनेक नेटिझन्सने सोशल मीडियावर ट्रोल केले.  इतकेच काय तर संपादक राजीव खांडेकर आणि न्यूज एंकर प्रसन्न जोशी यांना अनेकांनी फोन वरून  जाब विचारून तंग  केले होते. त्यात शिवसेना पक्षप्रमुख उद्धव ठाकरे यांनी, वर्धापन दिन कार्यक्रमात सावकरकरांना खलनायक म्हणणारे तुम्ही कोण ? असा सवाल केला होता, तसेच सावरकर प्रेमी जनतेने त्यांच्या जाहिरातदारांना एबीपी माझाला जाहिराती देणे बंद करण्याचे आवाहन केल्यानंतर काही जाहिरातदारानी जाहिराती बंद केल्या होत्या.
या सर्व प्रकारानंतर एबीपी माझाने परवा ऑन एयर माफी मागितली आणि वेबसाईट आणि युट्युब वरून याचे व्हिडीओ डिलीट केले.इतकेच नव्हे तर "माझा विशेष  आणि हस्तक्षेप"  हे दोन्ही चर्चात्मक कार्यक्रम गेल्या काही दिवसांपासून बंद केले आहेत.एबीपी माझाला हा मोठा झटका मानला जात आहे. 


शुक्रवार, २१ जून, २०१९

फेसबुक लाईव्ह करुन पत्रकाराचा आत्महत्येचा प्रयत्न

सोलापूर - फेसबुक लाईव्ह करुन पंढरपुरातील एका पत्रकाराने आत्महत्येचा प्रयत्न केल्याची धक्कादायक घटना समोर आली आहे. अभिराज उबाळे असं या पत्रकाराचं नाव आहे.एका न्यूज पोर्टलचा तो संपादक आहे. 

फेसबुक लाईव्हनंतर त्यांनी विषारी औषध प्राशन केलं. त्यानंतर त्यांना रुग्णालयात दाखल करण्यात आलं. सध्या त्यांची प्रकृती चिंताजनक असल्याची माहिती आहे.

अभिराज यांनी फेसबुक लाईव्हमध्ये आपल्यावर होणाऱ्या अन्यायाची व्यथा मांडली आहे. पंढरपुरातील नेते उमेश परिचारक, पंढरपूर पोलीस ठाण्याचे पोलीस निरीक्षक राजेश गवळी यांच्यासह काही जण केल्या काही दिवसांपासून आपल्याला जीवे मारण्याची धमकी तसेच त्रास देत असल्याचा आरोप अभिराज यांनी केला आहे.

अभिराज उबाळे यांचं फेसबुक लाईव्ह-

बुधवार, १९ जून, २०१९

भोईटे यांचे एबीपी माझावर अखेर 'तुळशी'पत्र !

मुंबई - बेरक्याचे वृत्त तंतोतंत खरे ठरले आहे. एका ठिकाणी स्थिर न राहणाऱ्या तुळशीदास भोईटे यांनी अखेर एबीपी माझावर 'तुळशी'पत्र   ठेवून  टीव्ही ९ मराठी  जॉईन केले आहे. वरिष्ठ कार्यकारी संपादक म्हणून त्यांना घेण्यात आले असून इनपूट आणि आऊटपूट  समन्वयक (Cordinator) याची जबाबदारी देण्यात आली आहे.

तुळशीदास भोईटे हे एका ठिकाणी स्थिर न राहणारे व्यक्तिमत्व ! सहा महिन्यात युनिट बदलण्याची त्यांची  जुनी परंपरा आहे. ही  परंपरा त्यांनी एबीपी माझा  सोडताना कायम ठेवली आहे. एबीपी माझा, टीव्ही ९  पासून सुरु झालेला प्रवास दोन वर्तुळ पूर्ण करून पुन्हा एबीपी माझा ,  टीव्ही ९ असा सुरु झाला आहे.

टीव्ही ९ मराठी मध्ये अगोदरच  निखिला म्हात्रे, गजानन कदम, माणिक मुंडे, सुनील बोधनकर असे चार कार्यकारी संपादक आहेत.त्यात  तुळशीदास भोईटे यांची भर पडली आहे. संपादक पदाचा चार्ज रोहित विश्वकर्मा यांच्याकडे कायम आहे. जुने चारही कार्यकारी संपादक थेट संपादकास रिपोर्ट करणार आहेत. त्यामुळे भोईटेना काम करण्यास पुन्हा एकदा अडचण निर्माण होणार आहे. ते टीव्ही ९ मराठी मध्ये किती दिवस रमणार हे पाहणे औत्सुक्याचे ठरणार आहे.


भोईटेचे गोलाकार वर्तुळ

> टीव्ही ९ ( आता दुसरी वेळ )
> झी २४ तास ( दोन वेळा )
> एबीपी माझा ( दोन वेळा ) 
> जय महाराष्ट्र ( दोन वेळा )
> ईटीव्ही मराठी ( १ वेळा )
> आयबीएन ७ ( १ वेळा )
>   मी मराठी ( १ वेळा )
> लोकमत ऑनलाईन ( १ वेळा )
> जनशक्ती पेपर ( १ वेळा )

सात जणांना नारळ भेटणार
टीव्ही ९ मराठी मधून एकूण ७ जणांना नारळ देण्यात येणार असल्याचे वृत्त आहे. पैकी चार जणांना अगोदरच राजीनामा देण्यास सांगितले असल्याचे वृत्त आहे. या सर्वावर अकार्यक्षमपणाचा ठपका ठेवण्यात आला आहे.




मंगळवार, ११ जून, २०१९

महाराष्ट्र राज्य मराठी पत्रकार संघाच्या अधिवेशनाचा समारोप

जळगाव -समाज माध्यमाच्या वाढत्या प्रभावामुळे वृत्तपत्रांसमोर नवी आव्हाने उभी राहिली आहेत. त्यामुळे अडचणीत आलेल्या वृत्तपत्रांना मदत आणि वृत्तपत्रात क्षेत्रात काम करणार्‍या पत्रकारांसह इतर घटकांच्या विकासासाठी महामंडळ स्थापन व्हावे या मागणीसाठी आपण शासन दरबारी प्रयत्न करू अशी ग्वाही सहकार राज्यमंत्री गुलाबराव पाटील यांनी दिली. बंद पडलेल्या पतसंस्थांसाठी आम्ही फेडरेशन उभा केले असुन त्यात विम्याची हमी दिली. याच धर्तीवर प्रसारमाध्यमांसाठीचे महामंडळ असावे अशी पुष्ठीही त्यांनी जोडली.

जळगाव येथे महाराष्ट्र राज्य मराठी पत्रकार संघ, मुंबईचे 14 वे राज्य अधिवेशनाचा समारोप कांताई सभागृहात रविवार दि. 9 जून रोजी सहकार राज्यमंत्री गुलाबराव पाटील, खासदार रक्षा खडसे यांच्या उपस्थितीत झाला. यावेळी संघाचे प्रदेशाध्यक्ष राजा माने, राज्य संघटक संजय भोकरे, प्रदेश कार्याध्यक्ष वसंत मुंडे, सरचिटणीस विश्‍वास आरोटे उपस्थित होते.

यावेळी गुलाबराव पाटील  यांनी पत्रकार संघाच्या मागणीला आपला पाठिंबा असुन शासन दरबारी यावर प्रयत्न करू तसेच  पत्रकार संरक्षण कायद्याला केंद्र सरकारकडून मंजुरी मिळावी यासाठी शिवसेना पाठपुरावा करेल अशी ग्वाही दिली.

राज्यस्तरीय महाराष्ट्र गौरव पुरस्कार व जिल्हास्तरीय पत्रकार संघाचे पुरस्कार  वितरण
अधिवेशनाच्या दुसऱ्या सत्रात  राज्यस्तरीय पत्रकारिता पुरस्कार वितरण करण्यात आले असून या वर्षीचा पुरस्कार उत्कृष्ट कार्याचा प्रथम पुरस्कार ठाणे जिल्हा पत्रकार संघ भगवान चंदे, द्वितीय क्रमांकाचा पुरस्कार मराठवाडा विभागातुन बिड जिल्हा पत्रकार संघ वैभव स्वामी, तृतीय क्रमांकाचा विर्दभ पुर्व महेश पानसे यांना प्रदान करण्यात आले. महाराष्ट्र गौरव पुरस्कार समाजभुषण प्रमोद अण्णा लबडे, उद्योजक सुरेश भागवत, डॉ भुषण मगर, आरोग्य, रविंद भादाले शिक्षण, डॉ स्वामी शिरकुल समाजभुषण या राज्यस्तरीय पुरस्काराणे सन्मानित करण्यात आले.
.


सोमवार, १० जून, २०१९

पत्रकार प्रशांत कनोजिया यांचा तात्काळ सुटका करा: सर्वोच्च न्यायालय

लखनौ : उत्तर प्रदेशचे मुख्यमंत्री योगी आदित्यनाथ यांच्याविरोधात सोशल मीडियावर आक्षेपार्ह पोस्ट टाकल्याप्रकरणी अटक करण्यात आलेले पत्रकार प्रशांत कानोजिया यांची तात्काळ सुटका करण्याचे आदेश आज (मंगळवार) सर्वोच्च न्यायालयाने दिले.
योगी आदित्यनाथ यांच्याविरोधात आक्षेपार्ह पोस्ट टाकल्याप्र
करणी दिल्लीस्थित पत्रकार प्रशांत कनोजिया यांना अटक करण्यात आली होती. तसेच नोएडातील एका खासगी वृत्तवाहिनीच्या प्रमुखालाही अटक करण्यात आली आहे. योगी आदित्यनाथ यांची प्रतिमा मलीन केल्याप्रकरणी लखनौमध्ये गुन्हा दाखल झाल्यानंतर पोलिसांनी कारवाई करत प्रशांत यांना ताब्यात घेतले होते. एका महिलेने योगींना लग्नाचा प्रस्ताव दिल्याबद्दलचा व्हिडिओ प्रशांत यांनी ट्विटर आणि फेसबुकवर अपलोड केला होता. याविरोधात त्यांची पत्नी सर्वोच्च न्यायालयात गेली होती.
सर्वोच्च न्यायालयाने आज या प्रकरणी सुनावणी करताना त्यांना तात्काळ सोडण्याचे आदेश दिले. सोशल मीडियावर पोस्ट टाकल्याने अटक करणे चुकीचे असल्याचे न्यायालयाने म्हटले आहे. न्यायाधीश इंदिरा बॅनर्जी आणि अजय रस्तोगी यांच्या खंडपीठाने हा निर्णय दिला आहे.
उत्तर प्रदेश पोलिसांनी केलेल्या कारवाईवर सर्वोच्च न्यायालयाने प्रश्न उपस्थित केले आहेत. सर्वोच्च न्यायलयाने कनोजिया यांच्या तात्काळ सुटकेचे आदेश दिले आहेत. मात्र, हा खटला सुरु राहणार असल्याचेही सांगितले आहे. कनोजिया यांनी उत्तरप्रदेशचे मुख्यमंत्री योगी आदित्यनाथ यांच्याविरुद्ध सोशल मीडियावर जे वक्तव्य केले ते चुकीचे होते. मात्र, त्यासाठी त्यांना अटक करण्याची काय आवश्यकता होती असा सवाल न्यायलयाने केला आहे.

मंगळवार, ४ जून, २०१९

नेटवर्क १८ चे माजी मार्केटिंग अधिकारी आनंद नारायण यांचा खून

मुंबई - नेटवर्क १८ चे माजी मार्केटिंग अधिकारी आनंद नारायण यांच्या खून प्रकरणी एका हॉटेल व्यावसायिकास पोलिसांनी अटक  केली आहे. सारंग पाथरकर असे या आरोपीचे नाव असून या  खून प्रकरणाचे सीसीटीव्ही फुटेज पोलिसांच्या हाती लागले आहेत.
आनंद नारायण यांचा खून हॉटेल व्यवसायातून झाला की प्रेम प्रकरणातून झाला ? याची दबक्या आवाजात चर्चा सुरु आहे. आरोपी सारंग पाथरकर याचे पुणे आणि मुंबईत हॉटेल असून, या हॉटेल मध्ये न्यूज १८ लोकमतच्या एका माजी संपादकाची पार्टनरशिप आहे. त्यामुळे या  संपादकाची चौकशी होण्याची शक्यता आहे. तसेच  आरोपी सारंग पाथरकर याची पुण्यातील काही पत्रकाराबरोबर उठबस होती, त्यामुळे अनेकांची झोप उडाली आहे.


नंदीबैलाची पुन्हा हकालपट्टी !

पुणे - अवघ्या सहा महिन्याच्या आत पद्मश्रीच्या पेपरमधून नंदीबैलाची  पुन्हा एकदा हकालपट्टी  करण्यात आली आहे. लोकसभा निवडणुकीत ३६ लाखाचा घपला केल्याचा सुगावा लागताच  पद्मश्रीनी  त्याच्या पार्श्वभागावर लाथ मारून हाकलून लावले आहे.

उदय भविष्यपत्रातून हकालपट्टी झाल्यानंतर नंदीबैल पुन्हा पद्मश्रीच्या पाया पडत  आला होता. मात्र त्याच्या सुमार कामगिरीमुळे दैनिकाचा खप दिवसेंदिवस घसरत चालला होता, तसेच त्याच्या एकंदरीत कारभारावर अनेक कर्मचारी विरोधात गेले होते. त्यात ३६ लाख रुपयाचा घपला केल्याचे समजताच   पद्मश्रीनी अक्षरशः शिव्या घालत त्याची  पुन्हा एकदा हकालपट्टी केली आहे. विशेष म्हणजे पैसे 'पद्मश्रीं'च्या नावे खाल्ले आणि एका वार्ताहराला त्यात गोवण्याचा प्रयत्न केला होता.

नंदीबैलाचे 2-4 बगलबच्चेही अजून वेगवेगळ्या 'हफ्तेखोरी'त सामील असल्याचीही चर्चा असून आता या बाहेर शेखी मिरविणाऱ्या, 'कलेक्टर' चोरांचाही हिशेब चुकता केला जाण्याची शक्यता आहे .

फेसबुक वर शेअर करा

Facebook